Мулоқот бо намояндагони БАТР

Душанбе, 22 август. (АМИТ «Ховар», Л. Қосимова).- 21 август дар Бонки миллии Тоҷикистон мулоқоти раиси бонк Абдуҷаббор Ширинов бо Масар Хонма — мудири Бонки аврупоии таҷдид ва рушд (БАТР) оид ба мамлакатҳои Осиёи Марказӣ ва Улф Хиндстром, роҳбари намояндагии БАТР дар Ҷумҳурии Тоҷикистон баргузор гардид.  Дар вохӯрӣ ҷонибҳо дар мавриди вазифа ва масъалаҳои рӯзмарраи низоми бонкӣ дар Ҷумҳурии Тоҷикистон ва ҳамкории минбаъда дар ин соҳа табодули назар намуданд. Ҳамчунин зимни мулоқоти судманд Масар Хонма, мудири Бонки Аврупоии таҷдид ва рушд оид ба мамлакатҳои Осиёи Марказӣ изҳор дошт, ки роҳбарияти бонк барои ба роҳ мондани ҳамкориҳои мутақобилаи муфид дар ҷодаи рушди бахши энергетикаи Ҷумҳурии Тоҷикистон мароқ зоҳир намуда истодааст. Мулоқот дар доираи ҳусни тафоҳуми тарафҳо анҷом ёфт. Дар ин бора ба АМИТ «Ховар» аз хадамоти матбуоти БМТ хабар доданд.