Мулоқоти Зарифӣ бо ҳайати Арабистони Саудӣ

Душанбе, 28 август. (АМИТ «Ховар», Баҳманёр Муродов).- Имрӯз, 28 август вазири корҳои хориҷии Ҷумҳурии Тоҷикистон Ҳамрохон Зарифӣ ҳайати намояндагони мамлакати Арабистони Саудиро, ки баҳри иштирок дар ҳамоиши нахустини Комиссияи муштараки Тоҷикистону Саудия ба Тоҷикистон ташриф оварда буданд, ба ҳузур пазируфт. Бар пояи иттилои Вазорати корҳои хориҷии кишвар дар ҷараёни мулоқот ҷонибҳо мавзуъҳои ҳамкориҳои иқтисодӣ ва тиҷоратии байни ду кишвар, аз ҷумла ҷалби сармояи кишвари Арабистони Саудиро ба Тоҷикистон мавриди баррасӣ қарор доданд.Гуфта мешавад, ки ҳайати мазкурро раиси Кумитаи сармоягузории давлатии Мамлакати Арабистони Саудӣ Абдуллатиф ибн Аҳмад ал-Усмон, ки ҳамзамон ҳамраисии ҷониби саудии Комиссияи муштаракро бар уҳда дорад, роҳбарӣ менамуд.