Вохӯрии сафири Тоҷикистон бо вазири энергетикаи Кувайт

Душанбе, 6 август. (АМИТ «Ховар»).- Дар Кувайт мулоқоти Сафири Фавқулодда ва Мухтори Ҷумҳурии Тоҷикистон Зубайдулло Зубайдов бо вазири энергетика ва оби ин кишвар Абдулазиз Абдуллатиф ал-Иброҳим доир гардид.  Зимни мулоқот даъватнома барои иштирок дар Конфронси сатҳи баланди байналмилалӣ оид ба ҳамкорӣ дар соҳаи об, ки 20-21 августи соли равон дар шаҳри Душанбе баргузор мегардад, ба вазири энергетика ва оби Давлати Кувайт супорида шуд. Сафири Тоҷикистон ба ҷониби кувайтӣ оид ба масъалаҳо ва мақсади конфронси мазкур, иштирокчиён ва ҳайатҳое, ки дар кори он иштирок мекунанд, муфассал маълумот дод. Абдулазиз Абдуллатиф ал-Иброҳим бо изҳори боварӣ таъкид намуд, ки Давлати Кувайтро ҳайати сатҳи баланд дар ҷаласаи мазкур намояндагӣ хоҳад кард, ки дар конфронс иштироки фаъолона хоҳад дошт. Ҳамчунин зимни мулоқот ҷонибҳо ҷиҳати рушди ҳамкориҳои дуҷониба дар соҳаҳои энергетикаву об байни Ҷумҳурии Тоҷикистон ва Давлати Кувайт табодули назар намуданд.