Боздиди ҳайати ҶМЧ аз АНМН

Душанбе,  2  сентябр. (АМИТ «Ховар», Кристина  Эрлих). – Чанде  пеш  ҳайати   Кумитаи   давлатии  мубориза  бо  маводи  нашъаовари Ҷумҳурии  Мардумии  Чин   бо  роҳбарии Дабири  кулли  кумитаи  мазкур  Хан  Сюйгуан аз  Агентии маводи  нашъаовари  назди Президенти  Ҷумҳурии  Тоҷикистон  дидор  намуд. 
 
Мувофиқи  хабари  Агентии  маводи  нашъаовар,  дар  ҷараёни  мулоқот  директори  Агентӣ  Рустам  Назаров  ба  меҳмонон  аз  тамоюлҳои  вазъи   маводи  нашъаовар  дар Тоҷикистону  Афғонистон  ва   минтақаи  Осиёи  Марказӣ,   ҳамчунин   перомуни   саҳми  Ҷумҳурии  Тоҷикистон  ба  мубориза бо  гардиши  ғайриқонунии  маводи  нашъаовар  нақл  кард. 
 
Ҷонибҳо  ҳамчунин   масоили   рушди   механизми ҳамкорӣ  дар  бахши  мубориза  бо  маводи  нашъаовар   дар  доираи  Созмони  Ҳамкории  Шанхай, вусъати минбаъдаи  ҳамкории  сарҳадбонон  дар  амри   мубориза  бо  ҷинояткорӣ,  роҳҳои  муайян шудани  мавқеи  ягона дар  арсаи  ҷаҳон  аз рӯи   масоили   мубориза бо  хавфи  маводи  нашъаоварро  мавриди  муҳокима  қарор  доданд.