Бунёди иншоот дар Восеъ вусъат мегирад

Восеъ, 24 сентябр. (АМИТ «Ховар», С. Холов).- Бо дастгирии ҳукумати ноҳияи Восеъ ва маблағгузории яке аз соҳибкорон дар деҳаи Ғаллазори ноҳия мактаби замонавӣ мавриди истифода қарор гирифт. Мактаби мазкур аз панҷ синфхона ва ду утоқи корӣ иборат мебошад, ки дар он дар як баст 120 нафар хонанда ба таълим фаро гирифта мешавад. Роҳбарияти ноҳия ба сокинони деҳа ва сохтмончиён, ки дар бунёди босифати иншоот саҳми арзандаи хешро гузоштанд, ифтихорномаю туҳфаҳои хотиравӣ такдим намуд. Ҳамчунин дар мавзеи Дашти Дилии деҳаи Кадучӣ як маркази саломатӣ кушода шуд, ки он минбаъд ба беш аз 2000 аҳолии деҳа хизмати тиббӣ хоҳад расонид. Зикр шуд, ки соҳибкори деҳа Сабзаалӣ Раҳмонов як қисми хонаи истиқоматии хешро ба муҳлати 15 сол ба ихтиёри кормандони соҳаи тибб гузоштааст. Ин бино аз панҷ ҳуҷра иборат буда, аз ҷониби раёсати тандурустии минтақаи Кӯлоб бо таҷҳизоти зарурии соҳавӣ таъмин гардид. Соҳибкорони ҷамоати деҳоти ба номи Мирзоалӣ Вайсов то охири соли ҷорӣ ба истифода додани боз якчанд иншооти ниёзи мардумро ба нақша гирифтаанд.