КМИР ба инъикоси раванди интихобот аҳамияти ҷиддӣ медиҳад

Душанбе, 30 сентябр. (АМИТ «Ховар», Бекназари Абӯбакр). — Имрӯз дар Комиссияи марказии интихобот ва раъйпурсии Ҷумҳурии Тоҷикистон бо иштироки намояндагони ВАО нишасти матбуотӣ доир гардид. Дар оғоз раиси КМИР Шермуҳаммад Шоҳиён доир ба ҷараёни тайёрӣ ба интихобот, амалӣ намудани чорабиниҳои нақшавӣ ва нақшаҳои минбаъдаи комиссияҳои интихоботӣ маълумот дод. Аз ҷумла зикр гардид, ки КМИР ба инъикоси раванди чорабиниҳои интихоботи Президенти Ҷумҳурии Тоҷикистон аҳамияти ҷиддӣ медиҳад, зеро шаффофияти интихобот аз кори ба самъи аҳолӣ расонидани иттилооти саривақтӣ ва саҳеҳ вобастагии калон дорад. Ш. Шоҳиён иттилоъ дод, ки барои баргузории интихоботи президентӣ 3153 участкаи интихоботӣ ташкил шуда, ҷиҳати дар доираи талоботҳои қонунгузории кишвар фаъолият намудани ин участкаҳо бо аъзои онҳо рӯзҳои наздик семинарҳои омӯзишӣ доир шуда, талаботои қонун ва қарорҳои КМИР шарҳу тавзеҳ дода мешаванд. Сипас гузориши роҳбари дастгоҳи КМИР Абдуманнон Додоев оид ба раванди ҷамъоварии имзоҳои шаҳрвандон ба тарафдории номзадҳо ба мансаби Президент пешбаригарида дар шаҳру ноҳияҳои кишвар, муроҷиату дархостҳои воридгардида доир ба ин масъалаҳо ва корҳои анҷомдодашуда дар ҳалли монеаҳои пайдошуда шунида шуд.Дар нишасти матбуотӣ намояндагони ВАО доир ба паҳлуҳои гуногуни ҷараёни тайёрӣ ба интихоботи Президенти Ҷумҳурии Тоҷикистон саволу дархостҳо пешниҳод карда, аз ҷониби масъулин ҷавобҳои мушаххас гирифтанд.