Масъалаи муҳоҷират дар ВАО баррасӣ гардид

Душанбе, 27 сентябр. (АМИТ «Ховар», Л. Қосимова). Имрўз, 27 сентябр дар толори Иттифоқи журналистони Тоҷикистон таҳти унвони «ВАО ва муҳоҷират» мизи гирд баргузор гардид. Дар он намояндагони Хадамоти муҳоҷирати назди Ҳукумати Ҷумҳурии Тоҷикистон ва намояндагони расонаҳои хабарии дохиливу хориҷӣ иштирок доштанд. Дар доираи мизи гирд инчунин 35-солагии фаъолияти журналисти шинохта Талабшои Холиқзод доир гардид. Раиси Иттифоқи журналистони Тоҷикистон Акбаралӣ Сатторов Т.Холиқзодро бо рўзи эҷодӣ табрик намуда, бобати мушкилоти муҳоҷират сухан намуд. А.Сатторов масъалаи интихоботи дар пеш истодаро хотиррасон намуда, таъкид сохт, ки ҳамаи муҳоҷирони меҳнатӣ ҳуқуқи иштирок дар интихоботро доранд ва дар шаҳрҳои Русия нуқтаҳои махсус барои муҳоҷирон ташкил мешавад.  Дар мизи гирд инчунин сухангўи шуъбаи робита бо ҷомеаи Хадамоти муҳоҷират Абдуллои Қодирӣ аз номи раиси Хадамот соҳибҷашнро бо 35-солагии фаъолияти эҷод табрик намуд. А.Қодирӣ ба иштирокчиён дар бораи вазъи муҳоҷирони меҳнатӣ, шумораи умумии муҳоҷирони тоҷик, мушкилоти муҳоҷират маълумот дод. Дар доираи мизи гирд инчунин инъикоси масъалаи муҳоҷират дар расонаҳои хабарии Тоҷикистон ва хориҷи кишвар мавриди баҳс қарор гирифт. Дар анҷоми чорабинӣ байни иштирокчиён ва намояндагони Хадамоти муҳоҷират суҳбати пурмуҳтаво сурат гирифт.