Намоишгоҳ – ярмаркаи байналмилалии ЭКСПО

Душанбе, 4 сентябр. (АМИТ «Ховар», Кристина Эрлих). – Раиси Палатаи савдо ва саноати Ҷумҳурии Тоҷикистон Шариф Саид дар ҳошияи Намоишгоҳ — ярмаркаи 3 — юми байнаймилалӣ ЭКСПО «Чин – АвруОсиё – 2013», ки аз 2 то 7 сентябр дар шаҳри Урумчии Ҷумҳурии Мардумии Чин идома меёбад, дар Форуми «Рушди иқтисодӣ ва ҳамкории Чин — АвруОсиё» сухан кард. Дар ин бора аз маркази матбуоти Палатаи савдо ва саноати ҶТ ба мухбири АМИТ «Ховар» хабар доданд.Шариф Саид зикр намуд, ки ҳамгироӣ дар савдои ҷаҳонӣ омили муҳими стратегияҳои ҷаҳонии рушди Ҷумҳурии Тоҷикистон ба шумор меравад, бинобар ин тиҷорат бояд ба расидан ба мақсадҳои иқтисодию иҷтимоӣ мусоидат кунад. Ба гуфтаи Шариф Саид дар ин амр ба ҳалли масоили коҳиш додани вақту хароҷоти сармоягузорон ҳангоми воридшавӣ ба бозори ҷаҳонӣ таваҷҷуҳи хоса дода мешавад. Бинобар ин дар ин самт механизми «равзанаи ягона» роҳандозӣ шудааст, ки коҳиш додани хароҷот ва осон гардонидани расмияти бақайдгирии давлатиро пешбинӣ менамояд. Дар робита бо ин, дар кишвар ҳамаи намудҳои тафтиши корхонаҳои навбунёд ба муддати се сол қатъ намуда, андози фоида ва андози арзиши изофӣ коҳиш дода, чор минтақаи озоди иқтисодӣ ташкил ёфтааст.