Сертификат барои дучархасаворон

Суғд, 23 сенябр. (АМИТ «Ховар», Самад Юсуфӣ).- 20 сентябри соли 2013 дар маҷлисгоҳи факултети № 4-и Академияи ВКД Ҷумҳурии Тоҷикистон бахшида ба хатми аввалин гуруҳи дучархасаворони милитсия чорабинӣ баргузор гардид. Гуруҳи мазкур дар асоси пешниҳоди Вазорати корҳои хориҷии Ҷумҳурии Тоҷикистон ба Вазорати корҳои дохилии Ҷумҳурии Тоҷикистон барои курси омўзишии занони милитсия дар асоси мавзўи «Баланд бардоштани мақоми зан дар мақомоти ҳифзи ҳуқуқ» аз тарафи гуруҳи кории «Эмерҷенс груп» тавсия шудааст. Сардори факултети №4-и Академияи ВКД Ҷумҳурии Тоҷикистон, доктори илмҳои ҳуқуқ, полковники милитсия Носир Назаров дар бораи саҳми занон дар мақомоти корҳои дохилӣ ва нақши ташкилотҳои хориҷӣ дар фаъолияти минбаъдаи милитсия ба тариқи мушаххас маълумот дод. Дар чорабинӣ ба 10 нафар занони милитсия, ки дар муддати 40 рўз курсҳои омўзишии ҳифзи тартиботи ҷамъиятӣ, этика, кодекси ахлоқ, патрули тактикаи дучархасаворӣ, истифодаи қувва, усулҳои худмуҳофизатӣ, стандартҳои риояи ҳуқуқи инсон, баробарии гендерӣ, хушунати оилавӣ, тафтишоти хушунати ҷинсӣ, омўзиши равонӣ барои мақомоти ҳифзи ҳуқуқ, идораи муноқишаҳо дучархасавориро омўхта буданд, сертификати хатми курс аз тарафи «Эмерҷенс груп» дода шуд.Дар қисмати дуюми барномаи чорабиниҳо ҳайати хатмкунандагон маҳорату малакаи хешро аз рўи дучархасаворӣ бо ҳашт усул ба ҳозирин намоиш доданд.