Супоридани Эътимодномаи Сафири Тоҷикистон ба Амири нави Давлати Қатар

Душанбе, 19 сентябр (АМИТ «Хвоар»).- 17 сентябри соли 2013 Сафири Фавқулода ва Мухтори Ҷумҳурии Тоҷикистон дар Давлати Қатар Ардашер Қодирӣ ба Амири Давлати Қатар Шайх Тамим ибни Ҳамад Оли Сонӣ Эътимоднома супорид. Баъди супоридани эътимоднома сӯҳбати Амири Давлати Қатар бо Сафири Тоҷикистон доир гардид, ки зимни он масъалаҳои вобаста ба ҳамкориҳои дуҷониба, раванди татбиқи лоиҳаҳои амалкунанда ва иқдомоти ҳарду ҷониб барои таҳким ва густариши ин ҳамкориҳо мавриди табодули назар қарор гирифтанд. Ҳамзамон, Амири Давлати Қатар Шайх Тамим ибни Ҳамад Оли Сонӣ ба сатҳи баланди ҳамкориҳои Давлати Қатар бо Ҷумҳурии Тоҷикистон баҳои баланд дода, омодагии кишвари худро ҷиҳати густариши минбаъдаи муносибатҳои мутақобилан судманд байни ду давлат таъкид дошт. Сафири Ҷумҳурии Тоҷикистон дар навбати худ ишора намуд, ки муносибатҳои Тоҷикистону Қатар дар таърихи ҳамкориҳои ду кишвари дӯст макони алоҳидаро дорост, ки бар дӯстӣ ва бародарии роҳбарони он асос меёбад. Ҷонибҳо ба боз ҳам густаришу таҳким ёфтани муносибату ҳамкориҳои дуҷониба изҳори умедворӣ намуданд.