Ҷаласаи ғайринавбатии саҳҳомони «Агроинвестбонк»

Душанбе, 18 октябр. (АМИТ «Ховар», Кристина Эрлих).- 16 октябр ҷаласаи ғайринавбатии саҳҳомони Ҷамъияти саҳҳомии кушодаи «Агроинвестбонк» баргузор гардид, ки дар он саҳҳомон, аъзои мушоҳидони шуро ва роҳбарияти бонк ширкат доштанд. Тавре ки аз Дафтари матбуоти «Агроинвестбонк» хабар доданд, дар ҷаласа масоили марбут ба интихоби аудитори хориҷии бонк барои тафтиши ҳисоботи молиявӣ тайи соли молиявии 2013, пеш аз муҳлат қатъ гардидани ваколатҳои ҳамаи аъзои шурои мушоҳидони бонк ва интихоби аъзои шурои нави он мавриди баррасӣ қарор гирифта, аз рӯи ҳамаи масоили баррасишуда қарорҳои дахлдор қабул шуданд. Дар ҷаласа роҳбари маъмурияти муносибатҳои байналмилалӣ, ҳисоботу таҳлили молиявии «Агроинвестбонк» Муҳаммадӣ Бобоев, проректори бахши таълими Донишкадаи молия ва иқтисоди Тоҷикистон Илҳомуддин Иброҳимов, мушовири иқтисодӣ оид ба Осиёи Марказии Вазорати рушди байналмилалии Британияи Кабир дар Тоҷикистон Собир Қурбонов, муовини аввали Вазири молияи Ҷумҳуриии Тоҷикистон Ҷамолиддин Нуралиев, мушовири давлатии Президенти Ҷумҳурии Тоҷикистон оид ба сиёсати бахши иқтисодиёт Фаррух Ҳамралиев аъзои шурои мушоҳидони бонк интихоб шуданд.