Ҷалби занону духтарон ба касбомӯзӣ

Ҳамадонӣ, 5 октябр. (АМИТ «Ховар», С. Холов).-Бо мақсади ҷалби занону духтарони маҳаллӣ ба касбомӯзӣ ва ташкили ҷойҳои нави корӣ дар ноҳияи Ҳамадонӣ бо маблағгузории ҳокимияти давлатии ноҳия як маркази нави касбомӯзии дӯзандагӣ фаъол гардонида шуд, ки баъди хатми он занону духтарон соҳибкасб гардида, дар корхонаҳои дӯзандагӣ ба кор ҷалб мешаванд. Ба марказ аллакай беш аз 60 нафар занону духтарони маркази ноҳия ва деҳоти атроф худро сабти ном кардаанд. Ба маркази мазкур 4 адад дастгоҳи дарздӯзии муосир аз ҷониби бахши занон ва оилаи мақомоти иҷроияи ҳокимияти давлатии вилояти Хатлон ва чор адади дигар аз ҷониби ҳукумати ноҳия дастрас шудааст ва рӯзҳои наздик боз 8 адад дастгоҳи дарздӯзии дигар ба марказ оварда хоҳад шуд. Чунин марказҳо ва коргоҳҳои хурди дӯзандагӣ дар марказҳои ҷамоатҳои деҳот фаъол гардонида шуда ва садҳо нафар занону духтарон дар онҳо касб меомӯзанд.