Афзоиши истеҳсоли ғалла дар ҷумҳурӣ

Душанбе, 25 октябр. (АМИТ «Ховар», Фарзона Ашӯрмадова).-Корхонаҳои соҳаи ғаллаи Вазорати энергетика ва саноати Тоҷикистон дар 9 моҳи соли равон ҷиҳати ба роҳ мондани фаъолияти мунтазам ва истеҳсоли маҳсулоти нав, афзоиш ва истифодаи пурраи иқтидорҳои истеҳсолӣ, таъмини корхонаҳои коркард бо ашёи хом ва бозорҳои ватанӣ бо маҳсулоти маҳаллӣ корҳои назаррасро ба анҷом расонданд. Тавре ки дар ин бора аз Вазорати энергетика хабар доданд, дар муддати нуҳ моҳ ба ҷумҳурӣ 408003,0 тонна ғалла ва 147531,2 тонна орд ворид шудааст. Истеҳсоли маҳсулот дар корхонаҳои соҳа ба 27,1 миллион сомонӣ расонида шуд, ки ин нисбат ба ҳамин давраи соли гузашта 6,2 млн сомонӣ зиёд мебошад. Гуфта мешавад, ки дар ин давра дар коргоҳҳои истеҳсоли картошкаи бирён «Чипси», макарон, семечка бо иқтидори 640 тонна дар як сол дар заминаи корхонаи амалкунандаи ҶДММ «Макколӣ»-и шаҳри Душанбе корхонаи орд бо иқтидори истеҳсоли 200 тонна орд дар як шабонарўз, корхонаи орди хозиразамони ҶММ «Стелла»-и шаҳри Душанбе бо иқтидори коркарди 120 тонна ғалла дар як шабонарўз, корхонаи «Ғаллаи Суғд»-и ноҳияи Б.Ғафуров иловатан бо як осиёби туркӣ бо иқтидори коркарди 100 тонна ғалла дар як шабонарўз фаъолияти истеҳсолӣ ба роҳ монда шудааст.