Баимзорасии якчанд санад зимни сафари расмии Ҳомид Карзай ба Душанбе

Душанбе, 21 октябр. (АМИТ «Ховар», Афшини Муқим).- Имрӯз дар доираи сафари расмии Президенти Ҷумҳурии Исломиии Афғонистон Ҳомид Карзай ба Ҷумҳурии Тоҷикистон якчанд санади марбут ба ҳамкориҳои дуҷонибаи Тоҷикистону Афғонистон ба имзо расид. Бо ҳузури сарони ду давлат нахуст Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Исломии Афғонистон «Оид ба ҳамкорӣ дар соҳаи безараргардонии башардӯстонаи минаҳо» аз ҷониби вазири корҳои хориҷии Ҷумҳурии Тоҷикистон Ҳамрохон Зарифӣ ва сарпарасти Вазорати корҳои хориҷии Ҷумҳурии Исломии Афғонистон Иршод Аҳмадӣ ба тасвиб расонида шуд. Зери Протокол дар бораи ворид намудани илова ба Созишнома байни Ҳукумати Ҷумҳурии Тоҷикистон ва Ҳукумати Ҷумҳурии Исломии Афғонистон оид ба нуқтаҳои гузаргоҳи сарҳади давлатӣ раиси Кумитаи давлатии амнияти миллии Ҷумҳурии Тоҷикистон Саймуддин Ятимов ва сарпарасти Вазорати корҳои хориҷии Ҷумҳурии Исломии Афғонистон Иршод Аҳмадӣ имзо гузоштанд. Созишнома миёни Вазорати молияи Ҷумҳурии Тоҷикистон ва Вазорати молияи Ҷумҳурии Исломии Афғонистонро вазири молияи Ҷумҳурии Тоҷикистон Сафаралӣ Наҷмиддинов ва ҳамтои афғони ӯ Ҳазратумар Зоҳирзол ба тасвиб расониданд. Сипас, аз ҷониби роҳбарияти олии ду кишвар Эъломияи муштараки Ҷумҳурии Тоҷикистон ва Ҷумҳурии Исломии Афғонистон дар бораи густариш ва таҳкими муносибатҳои дуҷониба ба имзо расид. Пас аз имзои асноди мазкур бо ҳузури Президенти Ҷумҳурии Тоҷикистон Эмомалӣ Раҳмон ва Президенти Ҷумҳурии Исломии Афғонистон Ҳомид Карзай нишасти матбуотӣ доир гашт, ки роҳбарони ду кишвар аз натоиҷи сафари навбатии Президенти Ҷумҳурии Исломии Афғонистон ба Тоҷикистон изҳори қаноатмандӣ намуданд.