Баргузории шоми санъати тоҷик дар шаҳри Генти Шоҳигарии Белгия

Душанбе, 30 октябр (АМИТ «Ховар»).- 9 ноябри соли 2013 дар шаҳри Генти Шоҳигарии Белгия баргузории шоми санъати тоҷик таҳти сарпарастии Сафорати Ҷумҳурии Тоҷикистон дар Шоҳигарии Белгия ва шаҳрдории шаҳри Гент ба нақша гирифта шудааст. Гент яке аз шаҳрҳои қадимтарини Аврупо буда, дар даврони шоҳаншоҳии Руми қадим бунёд ёфтааст. Ҳоло Гент яке аз марказҳои бузургтарини саноатӣ, фарҳангӣ ва илмию маърифатии Аврупост. Дар ҳошияи чорабинии мазкур консерт бо иштироки овозхони машҳури тоҷик Давлатманд Холов ва намоишгоҳи либосҳои тоҷикии чакан ва сӯзанӣ барпо мегарданд. Дар чорабинии номбурда, ки ба 22-юмин солгарди истиқлолияти Ҷумҳурии Тоҷикистон ва 21-умин солгарди иҷлосияи XVI Шӯрои Олии Ҷумҳурии Тоҷикистон бахшида шудааст, зиёда аз 300 нафар ширкат хоҳад варзид, ки бештари онҳо зиёиён, санъатшиносон, олимони донишгоҳҳои маъруфи аврупоӣ, ҳайати дипломатии муқими Белгия, намояндагони воситаҳои ахбори умуми Иттиҳоди Аврупо ва ҷамъияти тоҷик мебошанд.