Баррасии масоили иҷтимоию иқтисодии низоми идораи меҳнат

Душанбе, 25 октябр. (АМИТ «Ховар», Л. Қосимова). —   Имрўз, 25 октябри соли 2013 бо мақсади иҷрои Қарори Ҳукумати Ҷумҳурии Тоҷикистон ва дар мувофиқа бо тадбирҳои Вазорати меҳнат ва ҳифзи иҷтимоии аҳолии Ҷумҳурии Тоҷикистон, дар  Муассисаи давлатии «Пажуҳишгоҳи меҳнат ва ҳифзи иҷтимоии аҳолӣ» конфронси ҷумҳуриявии илмиву амалии «Масоили иҷтимоию иқтисодии такмили низоми идораи меҳнат дар Ҷумҳурии Тоҷикистон» ба кори худ шуруъ намуд. Ҳамоиш мушкилоти  рушди иҷтимоӣ, муносибатҳои меҳнатӣ, танзими содироти муҳоҷирати меҳнатӣ, ҳамчунин масъалаҳои бозори меҳнат, шуғли аҳолӣ ва омода намудани мутаххасисони  ҷавобгӯ ба  талаботи рўзро ҳамаҷониба баррасӣ менамояд.
Муовини якуми вазири меҳнат ва ҳифзи иҷтимоии аҳолии Ҷумҳурии Тоҷикистон Эмин Сангинов конфронсро ифтитоҳ бахшида, роҷеъ ба масъалаи мавриди назар андешаҳои хешро иброз намуд. 
Тавре ки аз шуъбаи муносибатҳои байналмилалӣ ва робита бо ҷомеаи Вазорати меҳнат ва ҳифзи иҷтимоии аҳолии ҶТ  хабар доданд, конфронси мазкур ду рўз идома ёфта, дар он ҷиҳати ҳалли масъалаҳои нисбатан ҷории муносибатҳои меҳнатӣ ва рушди иҷтимоӣ дар Ҷумҳурии Тоҷикистон тавсияҳои илмии асоснок таҳия мешаванд.