Беҳбудии некӯахволӣ аз тариқи идораи интегратсионӣ

Кӯлоб, 18 октябр. (АМИТ «Ховар», С. Холов).- Дар чаҳорчӯби Барномаи   «Ҷонибдории инкишофи иҷтимоии манотиқи куҳистон дар шаҳри Кӯлоб» конфронси миллӣ доир  ба беҳдошти муҳити зист таҳти унвони «Беҳбудии некӯаҳволӣ аз тариқи идораи интегратсионӣ ва пойдории захираҳо» баргузор шуд.Қабл аз оғози қисмати асосии конфронс дар даромадгоҳи толор намоишгоҳи таҷҳизоту масолеҳи сохтмонӣ барои нигоҳдории гармӣ дар хонаҳо ва иншооти ҷамъиятӣ, макети иншооти обтаъминкунӣ ва дигар тачҳизоту лавозимоте, ки дар ин барнома истифода шудаанд, доир шуд. Дар конфронс суҳбату баҳсу мунозираҳо дар мавзуъҳои марбут ба беҳдошти муҳити зист дар мавзеъҳои баландкуҳи минтақа, инчунин вобаста ба Стратегияи барномаи «Ҷонибдории инкишофи иҷтимоии манотиқи куҳистон барои солҳои 2011-2015» баррасӣ гардиданд. 
Дар конфронс зикр гардид, ки беҳбудӣ бахшидан ба даромад ва шароити зиндагӣ дар манотиқи деҳот дар Хатлон тавассути идораи захираҳои  табиӣ ва беҳбуд бахшидан ба муҳити зист барномаи намунавии таҷрибавӣ дар ин минтақа ба ҳисоб меравад.