Натиҷаи хидматрасонии ФБД тайи нӯҳ моҳ

Душанбе, 14 октябр. (АМИТ «Ховар»,  Лутфия  Эшонқулова). – Дар  ҷаласаи  кормандони  Ҷамъияти  саҳҳомии  кушодаи «Фурудгоҳи  байналмилалии Душанбе»  зикр  гардид, ки  тайи  нӯҳ  моҳи  соли  равон  ба  538  ҳазору  922  нафар  мусофирони хориҷшаванда ва  415  ҳазору  655  нафар  мусофирони  воридшаванда  хидмат расонида шудааст. 
Назар ба  хабари  котиби  матбуоти  Фурудгоҳи байналмилалии Душанбе  М.Шодиев,  дар  ҷаласа  муовини  директори генералии  фурудгоҳ  А.Иброҳимов  фаъолияти  фурудгоҳро  тавсиф  карда,  қайд  намуд, ки  то  имрӯз  фурудгоҳи  Душанбе бо 24 ширкати  ҳавопаймоӣ  ҳамкорӣ  дорад.
Дар  ҷаласа  сардори шӯъбаи  фурудгоҳҳо  ва  амнияти  ҳавопаймоҳои  Сарраёсати  ҳавопаймоии  мулкии  Вазорати  нақлиёти  ҷумҳурӣ  А.Нуров   натиҷаи  фаъолияти  фурудгоҳи  шаҳри  Душанбе  тайи  9  моҳи  соли  ҷориро ба таври   мусбат  арзёбӣ  намуд.