Тақвияти ҳамкориҳои байналмилалӣ дар самти муқовимат бо савдои одамон

Душанбе, 23 октябр. (АМИТ «Ховар», Руқияи Боймамад). -Имрӯз бо ташаббуси Комиссияи байниидоравии мубориза ба муқобили хариду фурӯши одамон ва дар ҳамкорӣ бо Созмони байналмилалии муҳоҷират дар Китобхонаи миллии ҶТ конфронси байналмилалӣ дар мавзӯи «Тақвият бахшидани ҳамкориҳои байналмиллалии мақомоти давлатӣ ва марказҳои таълимӣ дар самти муқовимат бо савдои одамон» баргузор гардид. Дар кори конфронс раис ва аъзои Комиссияи байниидоравӣ, сафирони ИМА, Ҷумҳурии Беларус дар Тоҷикистон, намояндагони сафоратҳои Федератсияи Русия, Ҷумҳурии Қазоқистон, Ҷумҳурии Туркия, Созмони байналмиллалии муҳоҷират, Созмони Амният ва ҳамкорӣ дар Аврупо, ташкилоти ЮСАИД, як силсила ташкилотҳои ғайриҳукуматӣ ширкат доштанд.
    Дар ҳошияи конфронси мазкур таҷрибаи миллии ҶТ дар самти мубориза бо савдои одамон мавриди баррасии иштирокчиён қарор гирифта, ҳамзамон намояндагони давлатҳои иштирокчии конфронс доир ба нозукиҳои ин самти кор байни худ табодули таҷриба намуданд.
  Зикр  шуд, ки дар ВКД воҳиди махсуси мубориза бо хариду фурӯши одамон таъсис дода шуда, бо мақсади расонидани кӯмак ба қурбониёни чунин намуди ҷинояткорӣ марказҳои дастгирӣ ва кӯмак  ба қурбониёни савдои одамон ташкил  шуданд.
    Бо мақсади такмили қонунгузории амалкунанда дар доираи фаъолияти Комиссияи байниидоравии мубориза ба муқобили хариду фурӯши одамон лоиҳаи қонунҳои ҶТ «Дар бораи муқовимат ба савдои одамон» ва «Дар бораи расонидани кӯмак ба қурбониёни савдои одамон» таҳия гардид.
   Зарурати қабули лоиҳаи қонунҳои мазкур дар он аст, ки аз рӯзи қабули қонуни амалкунандаи ҶТ «Дар бораи мубориза ба муқобили хариду фурӯши одамон» 8 сол сипарӣ гашта, дар ин давра таҳдидҳои нав пайдо шудаанд ва шахсони ҷиноятпеша зимни содир гардидани ҷиноятҳо аз тарзу усулҳои муосир ба таври васеъ истифода мебаранд.
     Бояд гуфт, ки Тоҷикистон аввалин шуда дар миқёси Осиёи Марказӣ 15 июли соли 2004 санади меъёрии махсус, яъне Қонуни ҶТ «Дар бораи мубориза ба муқобили хариду фурӯши одамон»-ро қабул  намудааст.
     Баргузории конфронси имрӯза  дар самти мубориза бо савдои одамон ва омода намудани мутахассисон барои фаъолият дар ин соҳа заминаи хуб гузошт.