Конститутсия – ҳуҷҷати тақдирсози миллат

Душанбе, 7 ноябр. (АМИТ «Ховар», Раъно Нусратуллоева).- Дар  Донишкадаи молия ва иқтисоди Тоҷикистон  бо ибтикори кафедраи ҳуқуқи иқтисодӣ ва молиявӣ конфронси илмию амалӣ бахшида ба Рӯзи Конститутсия (Сарқонун)-и Ҷумҳурии Тоҷикистон барпо гардид. Ректори донишкада Раҳматулло Мирбобоев иброз дошт, ки Конститутсияи Ҷумҳурии Тоҷикистон қонуни асосии давлат аст, ки асосҳои сохтори конститутсионӣ, ҳуқуқу озодиҳои инсон ва шаҳрванд, ташкили фаъолияти мақомоти ҳокимияти давлатиро муайян мекунад. 
Зариф Ализода, Ваколатдор оид ба ҳуқуқи инсон дар Ҷумҳурии Тоҷикистон перомуни мавзӯи «Конситутсия яке аз рукнҳои асосии давлату давлатдорӣ» гуфт, ки таъмини устувории ҳар як давлат ва инкишофи бемайлони асосҳои иҷтимоию иқтисодӣ ва сиёсию ҳуқуқии он аз Конститутсия (Сарқонун) маншаъ мегирад. Аз ин лиҳоз, Конститутсия ҳуҷҷатест, ки дар он асосҳои бунёдӣ муайян мешаванд. Дар муддати 19 соли мавҷудияти Конститутсия ба он ду маротиба тағйироту иловаҳо ворид шуданд, ки онро мукаммалтар намуданд ва ин раванд нишонаи рушд аст.
Бояд зикр намуд, ки маърӯзаҳои дигаре, ки дар конфронс садо доданд,  моҳияти асосии Конститутсияи Ҷумҳурии Тоҷикистон, таърихи қабул ва нақши он дар таҳкими қонунгузории миллии кишварро фарогир буданд.