«Ливои истиқлолият» -таҷлил аз Рӯзи Парчам

Кӯлоб, 23 ноябр. (АМИТ «Ховар», Ф. Мадаминов).- Дар шаҳри Кӯлоб аз ҷониби ҳукумати шаҳр бахшида ба ҷашни Парчами миллӣ чорабиниҳои сиёсӣ, илмӣ ва фарҳангӣ таҳти «Ливои истиқлолият» дар ҳамаи муассисаҳои таълимӣ ва ҷамъиятӣ ҷараён доранд. Аз ҷумла, дар Донишкадаи давлатии шаҳри Кӯлоб бахшида ба Рӯзи Парчам чорабинӣ доир гардид. Дар чорабинӣ олимон, шоирон, нависандагон, устодону донишҷӯёни донишкада ширкат варзиданд. Дар чорабинӣ дар мавриди дастовардҳои Истиқлолият дар давоми 21 сол ва таҷлили Рӯзи Парчами миллӣ сухан рафт. Дар робита ба ин тибқи қарори ҳукумати шаҳри Кӯлоб бахшида ба ин ҷашн бо иштироки ҳамаи муассисаҳои тобеи шаҳр аз хиёбони И.Сомонӣ то назди Донишкадаи давлатии Кӯлоб марши умумишаҳрӣ бо парчамҳою овезаҳо гузаронида мешавад.