Муҳокимаи масъалаи хидматрасонии иҷтимоӣ ба кӯдакони имконияташон маҳдуд

Душанбе, 26 ноябр. (АМИТ «Ховар», Фарзона Достонзода).- Имрӯз, 26 ноябр, дар шаҳри Душанбе бо иштироки намояндагиҳои дипломатии Фаронса, ИМА, Олмон ва Комиссияи Аврупо конфронси хотимавӣ таҳти унвони «Эҳё дар сатҳи ҷамоа: Тавсияҳо барои оянда» баргузор мегардад. Конфронсро намояндагии Федератсияи Handicap International (Ҳендикап Интернейшнл), барномаи Осиёи Марказӣ дар ҳошияи лоиҳаи Сифати зиндагӣ барои ҳама, рушди дастрасӣ ба хидматрасонии иҷтимоии кӯдакони имконияташон маҳдуд ва хонаводаҳои онҳо дар вилояти Хатлон бо дастгирии молиявии Иттиҳоди Аврупо созмон додааст. Тавре ки аз намояндагии Федератсияи Ҳендикап Интернейшл дар Тоҷикистон ба АМИТ «Ховар» хабар доданд, дар ҷараёни конфронс лоиҳаи беҳдошти дастрасӣ ба хидматрасонии иҷтимоии кӯдакони имконияташон маҳдуд бо василаи истифодаи стратегияи эҳё дар сатҳи ҷамоаҳо, ки онро Созмони умумиҷаҳонии тандурустӣ қабул карда буд, муаррифӣ карда мешавад.