Намоиши ҳунари зебо ва руҳпарвар

Душанбе, 27 ноябр. (АМИТ «Ховар», Гулбаҳор Худойбердиева).-Намошгоҳи асарҳои рассомони шинохтаи шаҳри Панҷакентро, ки ба карибӣ дар толори Кохи фарҳанги шаҳр баргузор шуд, метавон яке аз муҳимтарин рӯйдодҳои фарҳангии ноҳия тайи солҳои охир унвон кард. Дар намоишгоҳ қариб 200 асар самараи эҷоди бисёрсолаи рассомони соҳибистеъдод, ташабускори ташкили намоишгоҳ Шодмонқул Нарзуллоев, Лутфулло Ҷанобилов, Мулкия Муҳаммадиева манзури тамошобинони сершумор гардонида шуд.Рассомон дар асарҳояшон симои адибони классик ва муосири тоҷик, амсоли Абӯабдуллоҳи Рӯдакӣ, Робиаи Балхӣ, Лоиқ Шералӣ шахсиятҳо ва рӯйдодҳои муҳими таърихӣ, манзараҳои зебо ва руҳбахши куҳистонро бо меҳр ва ҳунари баланд тасвир кардаанд.Зимнан асарҳои рассомони панҷакентӣ борҳо дар намоишгоҳи шаҳри Душанбе ба намоиш гузошта, аз ҷониби тамошобинони сершумори соҳибзавқ ба баҳои баланд сазовор гардида буданд. Асарҳои ин рассомон ҳамчунин борҳо дар саҳифаҳои маҷаллаю рӯзномаҳои кишвар ба интишор расидаанд.