Шиносоии Зариф Ализода бо участкаҳои интихоботии пойтахт

Душанбе, 6 ноябр. (АМИТ «Ховар»Фарзона Ашӯрмадова).-Субҳи имрӯз Ваколатдор оид ба ҳуқуқи инсон дар Тоҷикистон Зариф Ализода барои овоздиҳӣ ба участкаи интихоботии №5 ноҳияи Фирдавсӣ ташриф оварда, овоз дод.
Тавре ки дар ин бора аз Хадамоти матбуотии Ваколатдор оид ба ҳуқуқи инсон дар Тоҷикистон хабар доданд, баъд аз раъйдиҳӣ  Ваколатдор оид ба ҳуқуқи инсон ҷиҳати шиносоӣ бо ҷараёни  ташкили кори участкаҳои интихоботӣ ва иштироки шаҳрвандон дар овоздиҳӣ аз кори участкаҳои интихоботии №12; 22; 30-и ноҳияи И.Сомонӣ, ки дар биноҳои асосии Донишгоҳи омӯзгории Тоҷикистон ба номи Қандил Ҷӯраев, Донишгоҳи тиббии Тоҷикистон ба номи Абуалӣ ибни Сино ва Донишгоҳи аграрии Тоҷикистон ба номи Шириншо Шотемур, участкаи интихоботии №4 ноҳияи Шоҳмансур, ки дар бинои Душанбе-Плаза таъсис дода шуда буд, шинос шуда, бо масъулини участкаҳои интихоботӣ атрофи масъалаҳои ташкили кори участкаҳо, муҳайё намудани шароит барои нозирони байналмилаливу миллӣ ва намояндагони васоити ахбори оммаи хориҷӣ ва ватанӣ суҳбат намуд.
Кор дар участкаҳои интихоботии мазкур бо инобати меъёрҳои интихоботи демократӣ ва озоду шаффоф ба роҳ монда шуда, шаҳрвандони кишвар бо истифода аз ҳуқуқи интихоботии худ дар раванди баргузории интихобот фаъолона иштирок доштанд.