Таъмири роҳҳо аз ҷониби «Бунёди роҳ»

Восеъ, 27 ноябр. (АМИТ «Ховар», С. Холов).-Бо сабаби солҳои зиёд таъмири асосӣ накардани роҳҳои мошингард, зиёд шудани шумораи мошинҳои калонҳаҷми боркашонӣ ва тоза накардани ҷӯю заҳкашҳои назди роҳҳо масофаи зиёди роҳҳое, ки аҳамияти байналхалқӣ ва ҷумҳуриявию маҳаллӣ доранд, валангор гардида, рафтуомади нақлиёт мушкил шудааст. Аз ин рӯ, дар баробари таъмиру барқарорсозии роҳҳо бо ҷалби сармояи хориҷӣ, Вазорати нақлиёти Ҷумҳурии Тоҷикистон аз ҳисоби маблағҳои худӣ таъмиру барқарорсозии роҳҳоро идома дода истодааст. Дар ҳамин замина дар километри 165-166-уми шоҳроҳи Душанбе-Кӯлоб бо фармоиши вазорати мазкур ҷамъияти «Бунёди роҳ» -и шаҳри Кӯлоб ба таъмири асосии беш аз 500 метр роҳ шуруъ кардааст. Бояд зикр намуд, ки новобаста аз таъмирҳои пайвастаи ҷорӣ аз ҷониби Муассисаи давлатии нигоҳдории роҳҳои ноҳияи Восеъ қитъаи мазкур зуд- зуд корношоям мегардид ва корхонаи «Бунёди роҳ» дар ин мавзеъ баъди кандани роҳ беш аз 5000 кубометр сангу шағал истифода бурдааст. Ба иттилои масъулон қитъаи роҳи мазкур дар рӯзҳои наздик пурра аз таъмир бароварда шуда, то расидани сардиҳо қирпӯш карда хоҳад шуд.