Вусъати корҳои сохтмонӣ дар Фархор

Фархор, 13 ноябр. (АМИТ «Ховар», С. Холов)-. Ба иттилои  сармеъмори ноҳияи Фархор  Сайидобид Ҳафизов  дар  10 моҳи соли ҷорӣ  дар ноҳия баҳри рушди соҳаи саноат, сохтмон, алоқа, роҳ ва дигар бахшҳои  хизматрасонӣ корҳои муайяне ба сомон расонида шудаанд, ки нисбат ба соли сипаригардида   ду баробар зиёд мебошанд. Дар ин давра сохтмончиёни ноҳия  ба маблағи 4 млн. 657 ҳазору 900 сомонӣ  корҳои пудратиро ба  анҷом расонида, аксари биноҳои  нақшавиро  мавриди истифода қарор доданд. 
Дар ин давра сохтмони осорхона, китобхона,  3 бунгоҳи тиббӣ, майдони варзишӣ, нуқтаҳои   фурӯши маводи  нафтӣ, боғи фарҳангӣ ва дигар иншоотҳои хурду бузург  ба истифода дода шуда, дар айни ҳол  таъмири шуъбаи таваллудхонаи беморхонаи  марказӣ   бо маблағгузории  Бонки рушди Олмон ба маблағи 3 млн. 358 ҳазор сомонӣ, сохтмони нотамоми мактаби  таҳсилоти миёнаи умумии Деҳқонариқ  барои 1176 хонанда аз ҳисоби  маблағҳои Бонки Саудии Рушд  ба маблағи 2 млн. 525 ҳазор доллари амрикоӣ  ва дигар сохтмонҳои нотамом идома  дошта,  дар арафаи анҷомёбӣ  мебошанд.