Зӯрозмоии универсалӣ миёни калонсолон дар шаҳри Медин

Душанбе, 22 ноябр. (АМИТ «Ховар», Ситора Раҷабова).-Аз 11-ум то 17-уми ноябри соли равон дар шаҳри Медини вилояти Калугаи Федератсияи Русия чемпионати ҷаҳон оид ба зӯрозмоиҳои универсалӣ миёни калонсолон дар ду намуд- аз намуди лайт, яъне гӯштингирӣ ва классика( намудҳои омехта) баргузор гардид.   Дар ин мусобиқа аз Тоҷикистон 3 нафар варзишгардухтар ва 3 варзишгарписар ширкат варзида, 9 медал: 4 нуқра ва 5 биринҷӣ ба даст оварданд. Ҳамчунин конгресси минтақавии Осиё оид ба муҳорибаҳои универсалӣ баргузор шуд. Дар он давлатҳои Осиё- Тоҷикистон, Ӯзбекистон, Эрон, Қазоқистон ва Туркманистон ширкат доштанд. Бо бисёрии овозҳо Собир Каримов аз Тоҷикистон раиси Федератсияи зӯрозмоии универсалии Осиё интихоб гардид. Дар ин бора аз Кумитаи ҷавонон, варзиш ва сайёҳӣ хабар доданд.