Бархе аз кӯчаҳои пойтахт тағйири ном карданд

Душанбе, 20 декабр.(АМИТ “Ховар”, Марзия Саидова).- Вакилони шаҳрӣ дар иҷлосияи ҳабдаҳуми Маҷлиси вакилони халқи шаҳри Душанбе бо қарорҳои марбута номи як силсила кӯчаҳои пойтахтро иваз карданд. Аз ҷумла, номи маҳаллаи Авул -1 ба Бунёдкорон, маҳаллаи Авул -2 ба Ободкорон, кӯчаи Федин ба номи собиқ муовини Сарвазири Тоҷикистон Асадулло Ғуломов, кӯчаи Репин ба номи Хайрулло Мирзоев, кӯчаи Чкалов ба номи Қандил Ҷӯраев, кӯчаи Клара Сеткин ба номи Маҳмудбек Нарзибеков ва кӯчаи Спартаки пойтахт ба номи Гурминҷ Завқибеков табдил дода шуд. Ҳамзамон дар иҷлосия ваколати вакили Маҷлиси вакилони халқи шаҳри Душанбе аз ҳавзаи интихоботии №3 С. Одинаев (бинобар фавт) пеш аз муҳлат қатъ гардонида шуд.