Гузариш ба ҳисобкунакҳои кортӣ дар Кӯлоб

Кӯлоб, 16 декабр. (АМИТ «Ховар», С. Холов).-Дар давоми панч соли охир масъалаи таъминоти барқ ба аҳолӣ ва пайваста рух додани садамаҳо дар шаҳри Кӯлоб кормандони шабакаҳои барқиро ба ташвиш овардааст. Сабаби асосӣ- куҳнаю фарсуда гардидани хатҳо ва таҷҳизоти барқдиҳанда дар хонаҳои баландошёна ва маҳалӣ мебошад. Сокинон бидуни ҳамаи қоидаҳои бехатарӣ аз марказҳои барқдиҳӣ ба хонаҳои истиқоматӣ худсарона хатҳои алоҳида кашидаанд, ки бе пайвастшавӣ ба ҳисобкунакҳо аз барқ истифода мебаранд. Масъалаи дигари ташвишовар сари вақт пардохт накардани ҳаққи истифодаи барқ мебошад. Аксари сокинон аз ин ҳисоб беш аз ҳазор сомонӣ қарздоранд. Бо мақсади рафъи ин мушкилот ва истифодаи сарфакоронаи кувваи барқ дар шаҳри Кӯлоб мутахассисони соҳа ният доранд, ки минбаъд ҳаққи истифодаи барқро аз муштариён ба тарзи пешпардохт қабул намоянд, ки ин боиси таъминоти мунтазами аҳолӣ бо барқ ва истифодаи сарфакоронаи он мегардад.Ба иттилои масъулон ҳамаи муштариёни ҳудуди шаҳри Кӯлоб бо ҳисобкунакҳои муосири кортӣ ва муштариёни ноҳия бо ҳисобкунакҳои электронӣ то семоҳаи дуюми соли 2014 таъмин карда хоҳанд шуд.