Кӯмаки ташхисию дармонӣ ба осебдидагон

Душанбе, 11 декабр.(АМИТ «Ховар», Марзия Саидова).- Намояндагии Кумитаи имдоди имом Хумайнии Эрон дар Тоҷикистон ба оилаҳои аз зилзила зарардидаи ҷамоати деҳоти Раҷаб Исмоили ноҳияи Ваҳдат кӯмаки ташхисию дармонӣ расонид.  Абдуғаффори Солеҳ -масъули умури идорӣ ва равобити умумии дафтари Кумитаи имдод дар Тоҷикистон дар суҳбат ба хабарнигори АМИТ «Ховар» гуфт, ки бо дастури раиси дафтари намояндагии Кумитаи имдоди имом Хумайнӣ дар Тоҷикистон Саидмаҳдӣ Ибодӣ, ки чанде пеш аз маҳали зилзилазада дидан намуд, дар ҳамоҳангӣ бо мақомоти иҷроияи маҳалии ҳокимияти давлатии ноҳияи Ваҳдат барои мардуми аз зилзила осебдидаи ҷамоати деҳоти Раҷаб Исмоил кӯмаки доруворӣ фиристода шуд. Дорувориро раиси бахши Кумитаи имдод дар Ваҳдат Абдулҳамид Зоиров бо пизишкони Кумитаи имдод Нигина Қаробекова ва Раъно Маҳмудова бо ташхиси дармонии тиббӣ ба мардуми осебдида тақсим намуданд.