М. Убайдуллоев Қ. Расулзодаро бо Ифтихорнома сарфароз намуд

Душанбе, 17 декабр.(АМИТ “Ховар”, Марзия Саидова).-Раиси Маҷлиси миллӣ Маҳмадсаид Убайдуллоев дар ҷараёни иҷлосияи шонздаҳуми палатаи болоии Парлумони мамлакат муовини аввали раиси Маҷлиси миллӣ Қоҳир Расулзода ва муовини раиси палатаи болоии Парлумони ҷумҳурӣ Қодири Қосимро бо «Ифтихорномаи Маҷли¬си миллии Маҷлиси Олии Ҷумҳурии Тоҷикистон” сарфароз гардонид. Ҳамзамон раиси Маҷлиси миллӣ аъзои дигари палатаи болоии Парлумони ҷумҳурӣ Хайрулло Асоев, Ғайбулло Афзалов, Мамадшо Илолов, Давлатшо Гулмаҳмадов, Ҳамид Абдуллоев, Қобиламоҳ Ғуломшоева ва Шамсмуҳаммад Назриевро барои фаъолияти пурсамарашон дар рушди парламентаризм бо «Ифтихорномаи Маҷли¬си миллии Маҷлиси Олии Ҷумҳурии Тоҷикистон” сарфароз намуд. Бояд зикр кард, ки Маҷлиси миллӣ, ки палатаи болоии Парлумони мамлакат маҳсуб меёбад, 33 аъзо дорад. Дар иҷлосияи шонздаҳуми Маҷлиси миллӣ ҳамзамон сохтор, рӯйхати вазифаҳо, шумораи кормандони дастгоҳи Маҷлиси миллӣ ва нақшаи хароҷоти палатаи болоии Парлумони ҷумҳурӣ барои соли 2014 тасдиқ гардид.