Мулоқот бо намояндагони ташкилотҳои хурди қарздиҳанда

Душанбе, 17 декабр. (АМИТ «Ховар», Кристина Эрлих).- «Вазъи ташкилотҳои хурди қарздиҳанда тайи 10 моҳи соли 2013 ва рушди минбаъдаи онҳо» — чунин буд мавзӯи мулоқоте ки охири ҳафтаи гузашта байни роҳбарияти Бонки миллии Тоҷикистон ва намояндагони ташкилотҳои хурди қарздиҳанда сурат гирифт. Тавре ки аз маркази матбуоти Бонки миллии Тоҷикистон ба мухбири АМИТ «Ховар» хабар доданд, иштирокдорони мулоқот перомуни муваффақияту нуқсонҳои мавҷуда сухан карда, ҳамзамон зикр намуданд, ки алҳол дар ҷумҳурӣ 118 ташкилоти хурди қарздиҳанда фаъолият дорад. Солҳои охир дар ин бахши бонкӣ афзоиши ҷалби сармояи ташкилотҳои хурди қарздиҳанда ба назар мерасад. Соли гузашта созмонҳои байналмилалӣ фаъолияти бархе ташкилотҳои хурди қарздиҳандаро ба дараҷаи баланд арзёбӣ намуданд.Дар ҷараёни мулоқоти муфид ба роҳбарони ташкилотҳои хурди қарздиҳанда тавсия шуд, ки мизонҳои фоизи қарзро коҳиш дода ва шаффофияти фаъолияти худро дар назди мизоҷон таъмин намоянд.