Мусодираи беш аз 43 кг маводи нашъадори «бангдона» аз мавзеи Шоҳон

Душанбе, 3 Декабр. (АМИТ «Ховар», Фарзона Ашӯрмадова).- Кормандони милитсияи ноҳияи Шурообод зимни гузаронидани чорабиниҳои оперативӣ-ҷустуҷӯӣ дар мавзеи Шоҳони ноҳияи мазкур 43 кг 780 грамм маводи нашъадори «бангдона» ёфт ва мусодира намуданд.Тавре дар ин бора сомонаи Вазорати корҳои дохилии кишвар хабар додааст, кормандони милитсия бо гумони даст доштан ба гардиши ғайриқонунии маводи мухаддир сокини 43-солаи ноҳияи мазкур Абдулмаҷид Бухориевро дастгир карданд, ки аз ў маводи нашъадори «бангдона» ба миқдори 43 кг 780 грамм дарёфт ва мусодира карда шудааст. Гуфта мешавад, ки аз рӯи ин ҳодиса мутобиқи моддаи 200 қисми 4 КҶ ҶТ парвандаи ҷиноӣ оғоз гардида, тафтишоти пешакӣ идома дорад.