Мусодираи навбатии маводи мухаддир

Душанбе, 26 декабр. (АМИТ «Ховар», Лутфия Эшонқулова).- Кормандони гумруки вилояти Хатлон беш аз 26 килограмм маводи мухаддирро мусодира намуданд. Тавре ки сардори маркази матбуоти Хадамоти гумруки Тоҷикистон Нурулло Шарифов ба АМИТ «Ховар» хабар дод, дар натиҷаи амалиёти махсус ду нафар шаҳрвандони ҶТ – Фазлиддин Саидови 25 – сола ва Муҳаммад Маҳмадиеви 19 – сола, ки сарҳади давлатии ҷумҳуриро хилофи қонун убур карданӣ буданд, дастгир намуда, аз онҳо миқдори зиёди маводи мухаддирро мусодира карданд. Назар ба хабари сардори маркази матбуоти Хадамоти гумрук, дар натиҷаи таҷзияи озмоишгоҳ маълум шуд, ки маводи мусодирашудаи мухаддир иборат аз 10 килограмму 737,7 грамм гашиш ва 15 килограмму 462,4 грамм тарёк будааст.Аз рӯи ин ҳодиса парвандаи ҷиноӣ кушода шудааст.