Мусодираи зиёда аз 43 кило маводи мухаддир

Душанбе, 20 декабр. (АМИТ «Ховар», Лутфия Эшонқулова).- Кормандони РВКД дар шаҳри Душанбе зимни гузаронидани чораҳои фаврӣ-ҷустуҷӯӣ бо гумони даст доштан дар гардиши ғайриқонунии маводи мухаддир шаҳрванд Муҳриддин Насриддинов, соли таваллудаш 1987, сокини ноҳияи Ҳамадониро дастгир намуданд.Тавре ки сомонаи расмии ВКД хабар медиҳад, аз ӯ ҳангоми кофтукови борхалтаи дар дасташ буда, 22 кг 176 грамм маводи нашъадори сахттаъсири героин, 12 кг 792 грамм маводи нашъадори афюн ва 8 кг 856 грамм маводи нашъадори навъи ҳашиш, ҷамъ ба миқдори 43 килою 924 грамм маводи нашъадор дарёфт ва мусодира карда шуд.Аз рӯи ин ҳодиса бо моддаи 200, қисми 4 Кодекси ҷиноии Ҷумҳурии Тоҷикистон парвандаи ҷиноӣ оғоз гардида, тафтиши пешакӣ идома дорад.