Нахустин доктори фахрии Донишгоҳи омӯзгорӣ

Душанбе, 4 декабр. (АМИТ «Ховар», Раъно Нусратуллоева).-Бо ибтикори бевоситаи ректори Донишгоҳи давлатии омӯзгории Тоҷикистон ба номи С.Айнӣ, академик Абдуҷаббор Раҳмонов нахустин маротиба дар таърихи бештар аз 80-солаи донишгоҳ Низомномаи «Доктори фахрии Донишгоҳи омӯзгорӣ» таҳия гардида, аз ҷониби ҳайати Шӯрои олимон тасдиқ шуд. Ба ин унвони олӣ шаҳрвандони бурунмарзие сазовор мешаванд, ки солиёни зиёд бо донишгоҳ ҳамкории устувор дошта бошанд ва пайваста дар самтҳои мухталиф таълимгоҳро дастгирӣ намоянд.Дар ҷаласаи Шӯрои олимон аввалин маротиба ба ин унвон директори Маркази хайриявии «Умед» А.А.Когай, ки шаҳрванди Ҷумҳурии мардумии Чин мебошад, сазовор дониста шуд. Мавсуф дар хусуси фаъолияти маркази хеш мухтасаран маълумот ироа кард. Сипас, устоди факултаи иқтисодиёт ва идоракунӣ дар соҳаи маориф А.Насимов пиромуни хизматҳои шоёни А.А.Когай қиссаҳо намуд. Дар такя бар гуфтаи ӯ, ин шахс ҳудуди 20 сол аст, ки дар ҷумҳурии мо фаъолият мекунад ва дар ин муддат омӯзгорону донишҷӯёни моро пайваста дастгирӣ намудааст. Аз ҳисоби маблағҳои хайриявии А.А.Когай чандин ҳуҷра дар хобгоҳ ба таври замонавӣ таъмир гардида, бо катҳои дуқабата ва дигар ҷиҳози ниёзи зиндагӣ таъмин шуд. Ҳамзамон, муддати мадид аст, ки ин марди шариф ба ятимони кулл ва кормандони камбизоат дасти ёрӣ дароз мекунад. Ҳайати Шўрои олимон якдилона ба ҷонибдории нахустин Доктори фахрии Донишгоҳи омӯзгорӣ раъй доданд.