Натиҷаи азму ғайрат

Турсунзода, 26 декабр. (АМИТ «Ховар», Ҳотам Рабиев).- Ғайрату матонат, сарҷамъӣ, сайю кӯшиш ва ҳадафи бунёдкорӣ ба сокинони деҳаи Шӯрхоки ҷамоати деҳоти Қаратоғ имкон дод, ки зиёда аз 10 километр роҳро ба таври ҳашар сангфарш намоянд. Ин амали хайру савоб мушкилоти равуои сокинони деҳаро ба куллӣ аз байн бурд. Дар деҳаи мазкур қариб 200 хонавода будубош дорад. Қариб ҳамаи онҳо дар беҳтар шудани сифати роҳ ҳиссаи арзанда гузоштанд. Аз ҷумла , марди саховатманд Абдусаттор Қодиров зиёда аз 20 ҳазор сомонӣ, сокинони ҳимматбаланди дигар Раҷабалӣ Сангинов, Сангиной Бобоева, Абдуқаҳҳор Қодиров, Рустам Норов ва дигарон бо маблағҳои муайян ҳисса гузоштанд.Дар сафарбар кардани мардум дар ин кори хайру савоб ҳиссаи раиси Кумитаи маҳалла Мирзоалӣ Бозоров хеле калон аст. Ҳиммати ба ҷӯш омадаи мардумро техникаҳои муқтадири КФД «Алюминсохтмон» қуввату тавоноии дигар бахшид.