Омодагӣ ба мавсими нави обёрӣ

Қӯрғонтеппа, 26 декабр. (АМИТ«Ховар», Мурод Сотиев). Иҷрокунандаи вазифаи раиси вилояти Хатлон Давлатшо Гулмаҳмадов ба раёсати хоҷагии оби вилоят дастур дод, то сари вақт шабакаҳои обрасониро барои мавсими нави обёрӣ омода намоянд.Тавре ки ба АМИТ «Ховар» аз шуъбаи иттилоотию таҳлилии дастгоҳи раиси вилоят иттилоъ доданд, Д. Гулмаҳмадов аз масъулони ин ниҳод талаб кардааст, ки заҳбуру заҳкашҳоро сари вақт тоза ва пойгоҳҳои обкаширо таъмиру тармим намуда, ба мавсими нави киштукор омода созанд. Д. Гулмаҳмадов ҳамчунин барои ҷамъоварии ҳаққи хизмати обрасонӣ аз истифодабарандагон супориш додааст. Роҳбари вилоят ҳамчунин ба зарурати сари вақт аз ғӯзапоя тоза намудани замин ва дар рӯзҳои наздиктарин ба анҷом расонидани шудгор таъкид кардааст. «Замин бояд то давраи кишти баҳорӣ дам гирад ва дар ин сурат метавонем аз он ҳосили баландро интизор шавем», — зикр кардааст роҳбари вилоят.