Парлумон ҳайати нави Ҳукуматро тасдиқ кард

Душанбе, 16 декабр.(АМИТ «Ховар», Марзия Саидова).-Парлумони Тоҷикистон 16 декабр дар ҷаласаи якҷояи ғайринавбатии Маҷлиси миллӣ ва Маҷлиси намояндагони Маҷлиси Олии Ҷумҳурии Тоҷикистон, даъвати чорум кабинаи нави Ҳукумати Ҷумҳурии Тоҷикистонро тасдиқ намуд. Аъзои Маҷлиси миллӣ ва вакилони Маҷлиси намояндагон 43 Фармони Президенти Ҷумҳурии Тоҷикистон Эмомалӣ Раҳмон дар бораи аз вазифа озод намудан ва ба вазифа таъйин намудани ҳайати нави ҳукуматро баррасӣ ва тасдиқ намуданд. Тибқи фармонҳои тасдиқгардида Қоҳир Расулзода- Сарвазири Ҷумҳурии Тоҷикистон, Давлаталӣ Саидов-муовини аввали Сарвазири ҷумҳурӣ, Марҳабо Ҷабборова, Муродалӣ Алимардон ва Азим Иброҳим муовинони Сарвазири ҷумҳурӣ таъйин гардиданд. Инчунин Рустам Менглиев-вазири адлия, Қосим Қосимов-вазири кишоварзӣ, Рамазон Раҳимов-вазири корҳои дохилӣ, Сироҷиддин Аслов-вазири корҳои хориҷӣ, Нуриддин Саидов-вазири маориф ва илми ҷумҳурӣ, Сумангул Тағоева-вазири меҳнат, муҳоҷират ва шуғли аҳолӣ, Абдусалом Қурбонов-вазири молияи ҷумҳурӣ, Шералӣ Мирзо-вазири мудофиа, Хайрулло Асоев -вазири нақлиёт, Шариф Раҳимзода- вазири рушди иқтисод ва савдо, Нусратулло Салимов-вазири тандурустӣ ва ҳифзи иҷтимоии аҳолӣ, Шамсиддин Орумбеков-вазири фарҳанги ҷумҳурӣ, Усмоналӣ Усмонов-вазири энергетика ва захираҳои оби ҷумҳурӣ, Шавкат Бобоев-вазири саноат ва технологияи нави кишвар, Саймуъмин Ятимов -раиси Кумитаи давлатии амнияти миллӣ, Зокиров Мамадтоир-раиси Кумитаи давлатии идораи замин ва геодезӣ, Қодири Қосим -раиси Кумитаи давлатии сармоягузорӣ ва идораи амволи давлатӣ таъйин гардиданд. Ҷумъа Давлатов -мушовири давлатии Президенти Ҷумҳурии Тоҷикистон оид ба сиёсати ҳуқуқӣ, ки ҳамзамон намояндаи комилҳуқуқи Президенти Ҷумҳурии Тоҷикистон дар Маҷлиси миллӣ ва Маҷлиси намояндагони Маҷлиси Олии ҷумҳурӣ аст, фармонҳоро дар назди аъзои Парлумони мамлакат тавзеҳ дода гуфт, ки баъди баргузории интихоботи Президенти Ҷумҳурии Тоҷикистон, ки 6 ноябр доир гардид, 18 ноябр ҳайати Ҳукумати Тоҷикистон ваколатҳои худро дар назди Президенти Ҷумҳурии Тоҷикистон вогузор намуда буданд. Аз ин рӯ бо фармонҳои Президенти Ҷумҳурии Тоҷикистон ҳайати нави ҳукумат ташкил шуда, тибқи қонунгузории кишвар онро бояд Парлумони мамлакат тасдиқ намояд. Намояндаи комилҳуқуқи Президенти Ҷумҳурии Тоҷикистон дар Парлумони мамлакат Ҷумъа Давлатов гуфт, ки дар кабинаи нави ҳукумати ҷумҳурӣ ду нафар зан шомил гардидаанд, ки яке муовини Сарвазир ва дигаре вазир аст. Маҳмадсаид Убайдуллоев- раиси Маҷлиси миллӣ ва Шукурҷон Зуҳуров-раиси Маҷлиси намояндагон, ки ҷаласаи муштараки Парлумон дар ҳамраисии онҳо ҷараён гирифт, аз номи аъзои Парлумони мамлакат намояндагони ҳайати нави ҳукуматро табрик намуда, дар фаъолияти минбаъдаашон саломатӣ ва комёбиҳо таманно намуданд. Зикр шуд, ки дар зарфи 7 соли оянда бояд кабинаи нави ҳукумат софдилона ва поквиҷдонона фаъолият намуда, бо масъулияти том баҳри таъмини пешрафти иқтисодиёти кишвар ва беҳдошти вазъи иҷтимоии аҳолии мамлакат саъю талош ба харҷ диҳанд.