ПСС ва Бонки ҷаҳонӣ бахши кишоварзиро дастгирӣ мекунанд

Душанбе, 16 декабр. (АМИТ «Ховар»).- Чанде пеш дар шаҳри Душанбе мулоқоти Раиси Палатаи савдо ва саноати ҷумҳурӣ Шариф Саид бо намояндагони лоиҳаи Бонки ҷаҳонӣ оид ба тиҷорати бахши кишоварзӣ Гарри Христенсен ва Ҷеки Бордман баргузор гардид. Тавре ки аз Палатаи савдо ва саноати ҷумҳурӣ ба АМИТ «Ховар» хабар доданд, ҷонибҳо дар ҷараёни мулоқот масоили лоиҳаи нави Бонки ҷаҳонӣ ҷиҳати дастгирии бахши кишоварзӣ, аз ҷумла савдои маҳсулоти кишоварзӣ, кор бо хоҷагиҳои фермерию деҳқонӣ, рушди равобити бахши инфиродию давлатӣ, масоили ҳамкории кишоварзии инфиродӣ ва ҳукуматро мавриди муҳокима қарор доданд. Шариф Саид аҳамияти лоиҳаро зикр намуда, аз мақоми Палатаи савдо ва саноат дар амри ҳамкорӣ бо бахши инфиродӣ ба манзури дастгирии фермерҳо ва ассотсиатсияҳо ҷиҳати дарёфти мушорикон, содироти маҳсулоти кишоварзӣ бо усули иштирок дар ярмаркаи намоишгоҳҳо иттилоъ дод. Ҷонибҳо ҳамчунин масоили дастрасии фермерҳо ба захираҳои молиявӣ, таъминот бо тухмию нурӣ, дастрасӣ ба техникаи хурди кишоварзиро муҳокима намуданд.