Таъсиси идрорпулӣ аз ҷониби соҳибкор

Кӯлоб, 18 декабр. (АМИТ «Ховар», Ф.Мадаминов).- Дар шаҳри Кӯлоб соҳибкор, сарвари ҶДММ «Ғайрат» Нуралӣ Ҳасанов бо мақсади иҷрои дастуру ҳидоятҳои Сарвари давлат ҷиҳати дастгирии маъюбон, ятимон ва оилаҳои камбизоат иқдом гирифт, ки аз ҳисоби даромади холиси ҷамъият дар Коллеҷи тиббии шаҳри Кӯлоб барои 20 нафар ва дар филиали Коллеҷи тиббии ноҳияи Муъминобод барои 10 нафар донишҷӯёни болаёқати маъюб, ятим ва камбизоат ба маблағи 50 сомонӣ идрорпулӣ таъсис диҳад. Мақсади пешгирифтаи соҳибкор аз ҷониби ҳукумати шаҳри Кӯлоб дастгирӣ гардида, бо қарори раиси шаҳр идрорпулӣ тасдиқ карда шуд. Дар айни замон шумораи донишҷӯёни идроргиранда аниқ гардида ва онҳо то моҳи декабри соли ҷорӣ бо идрорпулӣ таъмин шуданд. Мутобиқи шартномаи тарафайн ин иқдом то охири соли хониш давом дода мешавад . Соҳибкор ният дорад дар соли оянда вобаста ба меъёри кори ҷамъият ин шумораро боз ҳам зиёд кунад.