Таъсиси озмоишгоҳҳои байторӣ дар Кӯлоб

Кӯлоб, 14 декабр. (АМИТ Ховар», Сулаймон Холов). — Дар раёсати назорати байтории минтақаи Кӯлоб 400 нафар байтор кор мекунад, ки 200 нафари он соҳиби маълумоти олӣ мебошанд. Бо назардошти афзоиши саршумори чорвои калони шохдор ва моли майда ташвиши байторон бештар гардида ва мекӯшанд вазифаи хешро сари вақт иҷро намоянд. Дар давоми солҳои охир раёсати байтории минтақаи Кӯлоб бо мақсади ба байторон ва аҳолӣ дастрас намудани маводи доруворӣ барои ҳайвони калони шохдор ва моли майда клиникаҳои ветеринариро фаъол гардонид ва дар ин клиникаҳо ҳама намуди доруворӣ мавҷуд буда, шаҳрвандон имкон доранд онҳоро харидорӣ намоянд. Инчунин раёсати мазкур дар ҳамаи бозорҳои шаҳру ноҳияҳои минтақа озмоишгоҳҳои хешро фаъол гардонидааст, ки онҳо сифати маҳсулоти хӯрокаеро, ки ба бозор ворид мегарданд, аз ташхис мегузаронанд.