Туҳфа ба ғолибони мусобиқоти варзишӣ

Кӯлоб, 13 декабр. (АМИТ Ховар», Сулаймон Холов). — Бахши ҷавонон, варзиш ва сайёҳии минтақаи Кӯлоб дар якҷоягӣ бо намояндагии «Олимпиадаи махсуси Ҷумҳурии Тоҷикистон» доир ба намудҳои баскетбол ва тенниси рӯи миз мусобиқоти варзишӣ баргузор намуд. Мавриди зикр аст, ки ба ин мусобиқаҳо шумораи зиёди наврасону ҷавонон ҷалб гардида, барои мустаҳкам намудани дӯстӣ байни варзишгарон ва ташаккули тарзи ҳаёти солим маҳорати хешро сайқал медиҳанд. Дар мусобиқот шумораи зиёди наврасону ҷавонон аз мактаб-интернати ёрирасони №1 шаҳри Кӯлоб ва дастаҳои ноҳияҳои Восеъ, Ҳамадонӣ, Муъминободу Шӯрообод иштирок намуда, соҳиби ҷойҳои ифтихорӣ ва туҳфаҳои бахши ҷавонон, варзиш ва сайёҳии минтақаи Кӯлоб гардиданд. Бино ба иттилои масъулини чорабиниҳои варзишӣ барои иштирок дар мусобиқоти байналмиллалии параолимпӣ аз миёни ин варзишгарони наврасу ҷавон чеҳраҳои нави намудҳои тенниси рӯи миз ва баскетболро дарёфт намуда, ба машқу тамринҳои иловагӣ сафарбар мекунанд, то шарафи варзишии мамлакатро дар арсаи байналмилалӣ ҳимоя намоянд. Дар дигар шаҳру ноҳияҳои минтақаи Кӯлоб гузаронидани чунин чорабиниҳои оммавии варзишӣ дар назар аст.