Вакилони шаҳрӣ номи баъзе кӯчаю хиёбонҳоро тағйир медиҳанд

Душанбе, 9 декабр.(АМИТ «Ховар, Марзия Саидова).- 19 декабри соли равон дар шаҳри Душанбе иҷлосияи ҳабдаҳуми Маҷлиси вакилони халқи шаҳри Душанбе, даъвати чорум баргузор мегардад. Дар ин хусус раиси шаҳри Душанбе Маҳмадсаид Убайдуллоев, ки ҳамзамон раиси Маҷлиси вакилони халқи шаҳри Душанбест, қарори марбута ба тасвиб расонд. Интизор меравад, ки дар иҷлосия раиси шаҳри Душанбе М. Убайдуллоев доир ба иҷрои барномаҳои иҷтимоию иқтисодии пойтахт дар ёздаҳ моҳи соли 2013, нақшаҳои рушд, буҷети шаҳри Душанбе, вазифаҳои шаҳрдорӣ барои соли 2014 дар назди вакилони шаҳрӣ ҳисобот диҳад. Ҳамзамон дар иҷлосия масъалаҳои марбут ба номгузорӣ ва аз нав номгузории кӯча, хиёбон, майдон ва соири муассисаҳои таълимӣ дар пойтахт матраҳ хоҳанд гашт. Инчунин масъалаи вобаста ба ташкили Комиссияи шаҳрии интихобот оид ба интихобот ба Маҷлиси вакилони халқи шаҳри Душанбе баррасӣ гардида, тасдиқи як силсила қарорҳои раиси шаҳр дар назар аст.