«Варзиш барои ҳама»- барномаи варзишӣ

Кӯлоб, 17 декабр. (АМИТ «Ховар», С. Холов).-Бо мақсади ҷалби духтарон ба намудҳои гуногуни варзиш, мустаҳкам намудани дӯстӣ миёни варзишгарон ва дарёфти чеҳраҳои нави варзишӣ дар Коллеҷи тиббии шаҳри Кӯлоб мусобиқаи минтақавӣ оид ба волейбол байни ташкилоту идора ва коллеҷу омӯзишгоҳҳои шаҳру навоҳии минтақаи Кӯлоб гузаронида шуд. Мусобиқаи мазкур бо дастгирии Кумитаи миллии олимпӣ ва бахши ҷавонон, варзиш ва сайёҳии минтақаи Кӯлоб доир гардида, ду рӯз идома ёфта, шумораи зиёди мухлисону ҳаводорони ин намуди варзишро ба ҳам овард. Ба иттилои масъулин чунин мусобиқаҳо таҳти барномаи ҳамбастагии олимпии «Варзиш барои ҳама», ки дар моҳҳои ноябр ва декабри ҳамин сол ба нақша гирифта шудаанд, пайваста дар дигар шаҳру навоҳии мамлакат аз тарафи Кумитаи миллии олимпии Ҷумҳурии Тоҷикистон гузаронида мешаванд.