Вохӯрии президенти навини АИТ бо олимони ҷавон ва аспирантон

Душанбе, 17 декабр. (АМИТ «Ховар», Фарзона Ашӯрмадова).- Нимаи дуюми дирӯз, президенти тозаинтихоби Академияи илмҳои Тоҷикистон Фарҳод Раҳимов бо аспирантону олимони ҷавон вохӯрӣ намуд.Тавре ки дар ин бора аз Академияи мазкур хабар доданд, ин аввалин вохӯрии олимони ҷавон ва аспирантон бо президенти Академия мебошад, ки онҳо ин мулоқоти рӯ ба рӯро ба манфиати кор ва ҳавасмандии олимон ва аспирантони ҷавон унвон карданд. Дар мулоқот Фарҳод Раҳимов барои баланд бардоштан ва ҳавасманд намудани олимони ҷавону аспирантон дар Академия дар самтҳои «Монографияи илмии беҳтарин», «Мақолаи илмии беҳтарин», «Ихтироот дар илмҳои соҳавӣ», «Беҳтарин кашфиёте, ки дар истеҳсолот ҷорӣ мешавад» ва «Тарғиби дастовардҳои илмӣ дар ВАО» озмун эълон намуд. Гуфта мешавад, ки дар фарҷоми мулоқоти олимони ҷавон ва аспирантон бо Президенти нави Академия, ҳозирин ба хулоса омаданд, ки моҳе як маротиба чунин вохӯрии ошкоро байни раёсат ва аспирантону олимони ҷавони Академия сурат ёфта, ҳамчунин таъсиси «Шўрои олимони ҷавон» низ ба таври ҳамешагӣ ба роҳ монда шавад.