Ҷасади шаҳрвандони ҳалокшударо ба ватан меоранд

Душанбе, 2 январ. (АМИТ «Ховар»).- Хешовандони шаҳрвандони Тоҷикистон Т.Ғозиев ва Р.Назаров, ки бар асари таркиш дар шаҳри Волгогради Федератсияи Русия ҳалок шуданд, ҳар кадом ба ҳайси ҷубронпулӣ беш аз 2 миллион рубл мегиранд. Роҳбарияти шӯъбаи кӯмаки иҷтимоии Ҳукумати вилояти Волгоград зимни мулоқот бо корманди намояндагии Хадамоти муҳоҷирати ҶТ дар ФР Нусратулло Исматов ва раиси созмони ҷамъиятии тоҷикон дар шаҳри Волгоград Саидаҳмад Маҳмадов дар ин бора хабар дод.Тавре ки аз муассисаи мазкур иттилоъ доданд, аз ҷумлаи маблағи зикршуда 1 миллион рублро ҳукуматдорони федералӣ, 1 миллион рублро ҳукуматдорони минтақавӣ, 50 ҳазор рублро маъмурияти шаҳри Волгоград ва 18 ҳазор рублро ҳукуматдорони федералӣ барои дафни ҳалокшудагон ҷудо кардаанд.Ба ватан овардани ҷасади ҳалокшудагон барои имрӯз, 2 январ, пешбинӣ шудааст.