Ҷазои ҳабси абади 2 нафар дар соли 2013

Душанбе, 21 январ. (АМИТ «Ховар», Лайло Қосимова).-Аз 49 парвандаи ҷиноятии дар соли 2013 баррасишуда бо 46 парванда нисбат ба 80 нафар ҳукми айбдоркунӣ бароварда шуд. Бо як парванда нисбат ба 1 шахс чораҳои маҷбурии дорои хусусияти тиббӣ татбиқ гардида, як парванда нисбат ба 1 шахс бинобар нопурра будани таҳқиқ зимни тафтиши пешакӣ барои тафтиши иловагӣ баргардонида шуд ва пешбурди як парванда нисбат ба 1 нафар бинобар гузаштани муҳлати ба ҷавобгарии ҷиноятӣ кашида шудан қатъ гардид.Ин нуктаро зимни нишасти матбуотӣ раиси Суди олии ҶТ Нусратулло Абдуллоев зикр карда, афзуд, ки аз шумораи умумии маҳкумшудагон ба 66 нафар ҷазои маҳрум сохтан аз озодӣ, аз ҷумла, нисбат ба 2 кас ҷазои якумра ва нисбат ба 4 шахс ҷазои маҳдуд кардан дар хизмати ҳарбӣ таъйин карда шуда, нисбат ба 6 нафар ҷазо шартан татбиқ нашуд.