Вазорати тандурустӣ 98 тонна молҳои тиббиро нобуд сохт

Душанбе, 16 январ. (АМИТ«Ховар», Лайло Қосимова). – Дар қаламрави Ҷумҳурии Тоҷикистон 17 ширкати истеҳсолкунандаи маводи дорувории ватанӣ фаъолият мекунад. Ин нуқта зимни нишасти матбуотии Вазорати тандурустӣ ва ҳифзи иҷтимоии аҳолии мамлакат иттилоъ дода шуд.Зикр гардид, ки дар соли 2013 ба маблағи 103 миллиону 761 ҳазору 148 доллари ИМА ба ҷумҳурӣ маводи доруворӣ ва молҳои тиббӣ ворид гардид. Сифати 35 ҳазору 147 адад намуди маводи доруворӣ санҷида ва ба 34 ҳазору 896 намунаи адади онҳо сертификати мутобиқат ва шаҳодатномаи таҳлилӣ дода шуд. 251 намунаи адади онҳо аз сабаби ҷавобгӯ набудан ба талаботҳои стандартӣ аз муомилот гирифта шуд. Дар натиҷаи санҷишҳо аз тарафи комиссияи махсус миқдори 98 тонна маводи доруворӣ ва молҳои тиббии қалбакӣ, пастсифат, ба таври қочоқ воридшуда, муҳлатгузашта, бе сертификати мутобиқат ва сифат сӯзонида несту нобуд карда шуд.