«Қанд»- макони дилхушӣ?

Душанбе, 19.02.2014. (АМИТ «Ховар», Лутфия Эшонзода).- Раёсати фаврӣ-ҷустуҷӯӣ ва шуъбаи назорати муомилоти маводи нашъаовар ва пешгирии нашъамандии  Агентии назорати маводи нашъаовар (АНМН)-и назди Президенти ҶТ дар тарабхонаҳо ва дискоклубҳои шаҳри Душанбе, аз ҷумла “Фараҳноз”, “Шаҳрисабз”, ”Яккачинор”, “Русский двор”, “Зуҳро”, “Вохӯрӣ”, “Сафаралӣ Ико”, “Бешаи палангон”, “Сапеда», “Қанд” ва ғайра чорабиниҳои муштараки фаврию пешгирикунанда  гузарониданд. 
Тавре ки ба АМИТ «Ховар» аз маркази матбуоти АНМН хабар доданд, дар тарабхонаҳои мазкур аз ҷониби кормандони агентӣ дар самти пешгирии нашъамандӣ ва оқибатҳои сӯйистеъмоли маводи мухаддир, аз ҷумла навъи синтетикии он сӯҳбатҳо ташкил шуданд.
Ҳангоми вохӯриҳо ба иштирокчиён маълумот дар бораи зарари маводи нашъаовари навъи синтетикӣ, пешгирии ҳолатҳои истеъмоли маводи нашъаовар дар чунин марказҳо, ошкор намудани мизоҷони дар ҳолати мастӣ буда ва расонидани ёрии аввали тиббӣ дар ҳолати заҳролудшавӣ аз истеъмоли маводи нашъаовар пешниҳод шуд.